أحزاب ومونديال وصبابيط

شو عم يدرس المحروس؟
- عم يعمل دكتوراه بالاقتصاد.
- حرام عليك وعليه. ليش ما تدرّب فوتبول وتوفق بالمونديال؟.
- شو كل شهر في مونديال؟ شو بدّك يعمل بأوقات فراغ المونديال؟.
- كان فيه، على سبيل الاحتياط، ينتمي لحزب يقدر يأمّنلو حياتو. حزب شفاط من رتبة قاشوش.
- واذا الحزب راح وهجو وانتقل الوهج لحزب غيرو، شو المشكلة اذا ابنك انتقل عالحزب الوهاج؟ ليش شفت شي حزبي بعدو ثابت بعقيدتو، او شي حزبي ما بري نعلو هوي ويفشّخ من حزب لحزب ومن عقيدة لعقيدة؟ شو كل الناس جورج حاوي؟ ما سألتك، حضرتك بأيّا حزب اليوم؟
- لحدّ هلّق مش مقرر. حاطط اجر هون واجر هونيك، وعم بتطلّع لبعيد وناطر شو صاير!
- ما سألتكش شو لابس عا راسك؟
- صبّاطي، لأنو طلع واسع عا اجري. نقطة عالسطر.

المصدر: النهار